الصراحة .... فضيحة + تحديث

هو إيه اللى بيحصل للناس أول ما تلاقى قدامها بوفيه مفتوح؟؟؟؟

وليه الناس بتتهطل أول ما تشوف حاجة زى كده وتلاقى كل واحد ماسك فى إيده تلات أو أربع أطباق وداير بيهم محتاس مش عارف يحط فيهم إيه ولا إيه؟؟

وتلاقيه حاطط الحلو على المالح والمشويات على الطبيخ والفراخ على اللحمة وآخر قرف

الصراحة أنا شفت قدامى مهازل وكان آخرها فرح فى السعودية لقيت واحد مصرى زمايله سابوه ومشوا وعلشان يلحقهم راح على ترابيزة الفاكهة وأخد تفاحتين مع علبتين كنز وطلع يجرى لحد ما تفاحة وقعت منه

الصراحة .... فضيحة

التحديث

الفيديو ده مهدى للدكتورة ستيتة بعد ما قريت تعليقها

شفتى يا دكتورة الهوان اللى احنا فيه

عظيمة يا مصر

متأسف يا جماعة بس الصراحة مقدرتش أمسك نفسى عن التدوين بعد ما قريت الكلام ده ومجاش فى بالى كمان غير الصورة اللى فوق دى ومتهيألى إنها صورة الحكومة بتاعتنا

المقال ده قريته على مصراوى هنا

وهو بيتكلم عن أرقام وإحصاءات دولية عن المحروسة واللى عايشين فى المحروسة

الحالة النفسية

20 مليون مصري مصابون بالاكتئاب.
1200 حالة انتحار سنويا .. 24% منها في القاهرة ، 19.5% في القليوبية.
المركز 57 من بين 60 دولة في تقرير البؤس العالمي من حيث معدلات البؤس والشقاء والتخلف والفقر.
مؤشرات الفقر
48 مليون فقير يعيشون في 1109 مناطق عشوائية - أي 45% من المصريين (تقرير صندوق النقد الدولي للتنمية الزراعية)
2.5 مليون مصري يعيشون في فقر مدقع (تقرير الأمم المتحدة للتنمية الإدارية).
45% من المصريين يعيشون تحت خط الفقر يحصلون على أقل من دولار في اليوم (لجنة الانتاج الزراعي يمجلس الشورى).
41% من إجمالي عدد السكان في مصر فقراء (تقرير التنمية البشرية العربية 2009) (28.6% في لبنان - 30% في سوريا - 59.9% في اليمن).
12 مليون مصري ليس لديهم مأوى منهم 1.5 مليون يعيشون في المقابر (الجهازا لمركزي للتعبئة العامة والإحصاء).
16% من دخل الفرد في مصر ينفق على الطعام والشراب.
46% من الأسر المصرية لا تجد الطعام الكافى للحركة والنشاط (تقرير لشعبة الخدمات الصحية والسكان بالمجلس القومى للخدمات والتنمية الاجتماعية التابع للمجالس القومية المتخصصة).

الحريات وحقوق الانسان

40 حالة تعذيب مثبتة رسميا في 2007 و 28 حالة في 2008 غير الحالات التي لم يمكن اثباتها(المنظمة المصرية لحقوق الانسان).
93 حالة وفاة تحت التعذيب في 2007، 56 حالة لتعذيب المواطنين داخل أقسام الشرطة، من بينها (13) حالة وفاة غامضة و25 حاله اضطهاد واحتجاز تعسفي، وذلك خلال الفترة من يونيو 2008 حتى فبراير 2009 (المنظمة المصرية لحقوق الانسان).
مئات الأحكام القضائية واجبة التنفيذ كتعويضات وافراج عن سجناء لا تنفذ ولا يوجد سبيل لإجبار وزارة الداخلية على تنفيذها!

النقل والمواصلات

22.4 ألف حادث سيارة في 2007.
88 ألفًا و779 قتيل، و 379 ألف و233 مصاب بسبب حوادث الطرق في الفترة ما بين 1990 إلى 2006 .. المركز الأول على مستوى العالم في معدلات خسائر الأرواح (الجهاز المركزى للتعبئة العامة والإحصاء).
7394 حادث بقطاع السكة الحديد في الفترة ما بين 2000 و2006، أسفرت عن مصرع 573 شخصا وإصابة 805 آخرين.
4 مليارات جنيه خسائر سنوية بسبب حوادث الطرق (مركز المعلومات ودعم اتخاذ القرار).
الفساد
39 ملياراً و373 مليوناً و524 ألف جنيه تم اهدارها في الفترة ما بين أبريل 2008 ويناير 2009 بسبب الفساد المالي والإداري (تقرير عام 2008 لمركز الدراسات الريفية).
8 مليار جنيه دعم سنوي لأنابيب البوتاجاز (يبلغ احتياطي مصر من الغاز الطبيعي 67 تريليون قدم مكعب، وتبيع المليون وحدة حرارية لإسرائيل 1.5 دولار والتي يتكلف انتاجها 2.65 دولار .. سعر التصدير العالمي من 6 الى 8 دولارت للمليون وحدة حرارية).
المركز 134 من بين 134 دولة في معدل تعيين الاقارب والأصدقاء في المناصب المختلفة (تقرير التنافسية العالمية).
المركز 115 من بين 134 دولة في مؤشر مدركات الفساد الذي يقيس درجة انتشار الفساد بين المسئولين في الدولة (تقرير التنافسية العالمية).
المركز 72 من 134 على مؤشر الشفافية والنزاهة لمنظمة الشفافية العالمية في 2006، ثم المركز 105 في 2007 ثم الركز 115 في عام 2008 (منظمة الشفافية العالمية).
المركز 77 من بين 146 دولة في تقرير منظمة الشفافية الدولية لعام 2007 (إسرائيل من أفضل 20 دولة).

المجال الصحي

ربع سكان مصر يعانون من ضغط الدم.
أعلى معدل لوفيات الأطفال في العالم (50 طفل لكل 1000 مولود) .. 3 في السويد .. 4 في اليابان (جهاز التعبئة العامة والإحصاء).
29% من أطفال مصر لديهم تقزم و 14% لديهم قصر قامة حاد وطفل من كل اثنين لديه انيميا (مديحة خطاب رئيس لجنة الصحة بأمانة سياسات الحزب الحاكم).
9 مليون مصري مصابون بفيروس (سي) .. تحتل مصر المركز الأول في معدلات الإصابة بالمرض على مستوى العالم
8 مليون مواطن مصابون بالسكر والمركز الثاني على مستوى العالم في الوفاة بسبب المرض (مديحة خطاب رئيس لجنة الصحة بأمانة سياسات الحزب الحاكم).
من أعلى معدلات الوفيات على مستوى العالم بسبب انفلونزا الطيور الذي أصبح مرضاً متوطناً في مصر (إلى جانب مخاوف من توطن انفلونزا الخازير ، ظهور حمى التيفود، مخاوف من انفلونزا الكلاب).
4% من سكان مصر يعانون من مرض أنيميا البحر المتوسط الذي يصيب الأطفال (تقرير لوزارة الصحة).
20 ألف مواطن يموتون سنويا بسبب نقص الدماء (تقرير لوزارة الصحة).
اكثر من 200 حالة إصابة بحمى التيفويد، منها 164 في قرية واحدة خلال أقل من اسبوعين (ولا يزال السيد المستشار عدلي حسين محافظاً للقليوبية!!).
اكثر من 100 ألف مواطن مصري يصابون سنوياً بالسرطان بسبب تلوث مياه الشرب (د‏.‏ أحمد لطفي استشاري أمراض الباطنة والقلب بمستشفي قصر العيني).

مؤشرات أخرى

26% من المصريين لا يعرفون القراءة أو الكتابة.
16 شابا من بين 100 شاب شربوا المخدرات.
178 مليار جنيه هي تكلفة علاج الإدمان في عشر سنوات فقط.
10 مليون عاطل (في سن 15 الى 29 عاما) أي 21.7% من إجمالي قوة العمل.
9 مليون شاب تخطوا سن 35 عاماً دون زواج (5.5 مليون شاب + 3.5 مليون فتاة) بمعدل عنوسة 17%.
255 ألف حالة زواج عرفي بين الطلبة (أي 17% من طلبة الجامعات) نتج عنها 14 ألف طفل مجهول النسب.
المركز 129 بين 134 دولة في معدل هجرة العقول العلمية والموهوبة وتعد أسوأ دول الشرق الأوسط في ذلك (تقرير التنافسية العالمية).
المركز 134 من بين 134 دولة في مؤشر كفاءة سوق العمل (تقرير التنافسية العالمية).
المركز 125 من بين 134 دولة في مؤشر استقرار الاقتصاد الكلي (تقرير التنافسية العالمية)

تفتكروا أنا كان عندى حق فى الصورة دى

F . R . I . E . N . D . S

فى كوكب بعيد عن المجموعة الشمسية اسمه كوكب آبى قعد واد اسمه ميخو لسه خارج حالاً من العباسية من عنبر العقلاء ولقى مجموعة من المدونيين مسميين نفسهم الضاحكون ومجتمعين على سومة كافيه وهناك همس الأحباب وقالوا احنا لازم نعمل حاجة علشان الشعب لابد له من حكومة تشكمه قامت بنت خيخة وأى كلام أتنططت كده وعملت زى بطوط الحبوب وقالت لأ بقى الحكاية أصلها مش سبهللة ولا هى نعكشة احنا لازم نعرف الطريق إلى الكوشة علشان نبقى ناسبنا الحكومة وناكل معاها طعمية سخنة من مطعم الحاج محمد علشان يبقى عيش وملح وفى وسط ماهى بتتكلم لقينا واحدة صيدلانية طالعة نازلة وبت مشمشمية حلوة بس شقية عمالة تضحك وتتهكم وتقول هئ.... كاسك يا وطن انا طهقانة ومخنوقة ومفروسة كمان من الحكومة دى لإن أنا أصلاً كنت عاوزة اتجوز وأعمل لجوء سياسى فى بيت أى مراقب مصرى الصراحة بقى انا مش عارفة بس نفسى أعرف هى المواجهات اللى بينا وبين الحكومة دى ما بتخلصشى ليه.

قام مهندس مصرى بيحب مصر رد عليها وقالها يا روح قلب ماما دى دموع تماسيح يا أمى مش دموع الورد بصى يا أختى أقعدى ساكتة كده بقى وبلاش فضايح انا أتعلمت إن ألوان الحياة يا أبيض يا بنجاواتى إنما أنا قابلت ست من الصعيد الجوانى عايشة فى عالم مولان وبتقولى مرحباً بكم بين نبضات قلبى الولهان، ولهان مين يا ست ،قالتلى أقعد إنت بس ده الروقان كله مع كباية شاى وسندوتش شكلك كده جعان وهاتتعبنى معاك.
بص يا سيدى أولاً ده مش احساسى أنا ده احساس طفلة محبة للرومانسية بس واقعية احنا عاوزين نعمل جبهة ضد الحكومة بس أنا مالقتلهاش عنوان أو ممكن نسميها جبهة التهييس الشعبية برئاسة أحمد الصباغ وعضوية جحا المصرى و م / أحمد أبو العلا و أمة الله علشان احنا المدونين لازم يكون عندنا كاريزما كده مع الحكومة ويكون لينا وقفة جامدة معاها بس أنا حاسة إن كل ده هايكون تخاريف وأحاسيس آيوشة أو رغى إمرأة غير مطحونة بس أعمل إيه ماهو برضه من غلبى ولا أقولك... فكك منى عوووووووووو.
قام الواد ميخو كتب الكلام ده وقال أنا من رأيى يا جماعة نعمل سايت على النت ونقول فيه كل آرائنا وأفكارنا ونسميه عسقوووول أو فشكوووول دوت كوم علشان أول ما الحكومة تكبس علينا كل واحد فينا يعمل نفسه عجوز وعنده 30 سنة أو ينط فى الكوز على طول لحد ما الحكومة تبطل لماضة وتعرف حنين القلب طريقه منين ونعرف بقى نقب على وش الدنيا ونعيش أحلى ما فى اللحظة ونشم رحيق الحياة

.

.

.

شوكولاتة

شوكولاتة الناتة كوناتة
مدونة جديدة وطعمها حلو
أختى اللى خلصت على كل الشوكولاتة اليابس منها واليافع
ولو حصل أزمة عندكم فى السوق اعرفوا إنها جت عندكم
تحياتى للجميع

عيد ميلاد أمى عيد ميلاد أحلى البشر

كل سنة وإنتى طيبة يا ماما

كل سنة وإنت طيبة يا حبيبة قلبى

كل سنة وإنت طيبة يا أحلى أم فى الدنيا

كل سنة وإنتى بصحة وعافية

كل سنة وإنتى فى حضنى

كل سنة وانا فى حضنك

فاكرة يا ماما

فاكرة لما كنت كل يوم أصحى الصبح بدرى آلاقيكى إنتى وبابا صاحيين وعمالين

تقروا قرآن بعد ما تصلوا الفجر

فاكرة لما كنتى بتفضلى صاحية بتسمعى قناة إقرأ وتقعدى تندهى عليا لحد ما

تصحينى علشان أروح الشغل

ولو صحيت أنا لوحدى كانت بتبقى معجزة

فاكرة أول لما كنت باصحى وآلاقيكى قاعدة على الكنبة جنب باب الأوضة كنت

أول حاجة بعملها

إنى أمسك خدودك وأغلس عليكى

وكنتى أول حاجة بتقوليهالى

تبصيلى وتضحكى وتقوليلى يا غلس عاوز تفطر إيه

أقولك أى حاجة

تروحى تطلعى تجرى على المطبخ وتحضريلى طبق الفول علشان نقعد ناكل احنا

الاتنين مع بعض فى نفس الطبق

فاكرة يا ماما

فاكرة لما كنت برجع من الشغل متضايق تخشى عليا الأوضة وتقعدى معايا على

السرير وأفضل أحكيلك وأنا متضايق ومتنرفز لحد ما أحس بالقهر وأترمى على

حضنك وأقعد أعيط

تقوم عينيك تدمع علشانى وتعيطى معايا وتقولى حسبى الله وهو نعم الوكيل فى اللى

ظلمك

فاكرة كنت برتاح أد إيه بعد قعدتنا دى

وأرجع بطبيعتى تانى وأقعد أرخم عليكى إنتى وبابا وأخواتى

أهو أنا دلوقتى بعيد عنك يا ماما

بس إنتى وحشتينى قوى

وحشتينى قوى قوى قوى والله يا ماما

نفسى فى غربتى أرجع أعيط تانى على صدرك

نفسى أرجع أشد خدودك تانى وأرخم عليكى

وحشتينى قوى قوى يا أحلى أم فى الدنيا

أنا بحبك قوى

مصر التى فى خاطرى

سأل طفل اباه ما هي السياسة؟
فقال الأب: دعني أحاول أشرح لك معنى السياسة
أنا مصدر رزق الأسرة لذلك سنطلق علي أسم الرأس مالية
وأمك هي المدير المالي لذا سنطلق عليها أسم الحكومة
ونحن هنا لنهتم باحتياجتك لذا سنطلق عليك أسم الشعب
والخادمة سنعتبرها الطبقة العاملة
وأخوك الصغير سنطلق عليه أسم المستقبل
والآن فكر في هذا و أنظر ما إذا كان يبين لك المعنى
...
...
وفي و قت متأخر من الليل ذهب الطفل إلى الفراش يفكر فيما قاله أبوه
فسمع صوت أخيه الصغير يبكي, فقام ليرى ما به فوجده بال في حفاظته فذهب لغرفة ابويه فوجد أمه غارقة في النوم فلم يرد إيقاظها,, ثم ذهب إلى غرفة الخادمة فوجدها مغلقة.. أختلس النظر من فتحة الباب فوجد أباه على السرير مع الخادمة,, أستسلم الطفل للنعاس ورجع على فراشه...
....
....
وفي اليوم التالي قال الطفل لأبيه: أظنني الآن فهمت معنى السياسة
قال الأب : ممتاز , أخبرني ما الذي فهمته!!!
رد الطفل: حسناً

بينما تعبث الرأسمالية بالطبقة العاملة تكون الحكومة غافلة نائمة فيصبح الشعب مهملاً والمستقبل في منتهى القذارة
----------

------

عذراً دكتورة مروة الشربينى فهذه هى صورة مصر التى فى خاطرى

------

----------

مصر يا أما يا سفينة أتخرمت وغرقت بينا

جالى ده على الإيميل

بدون تعليق وبالصورة

المسئول عن فلوس واموال مصر...مدير بيت مال المسلمين والزيادة الاجتماعية

و

فلوس المعاشات قاعد بيلعب جيمز على البلاك بيري

أنا

مش مصدق بجد ان دول المسئولين عن مصر وبعد كدة بنقول البلد بتتاخر بينا ليه

بقول

ولا مش عارفين نتقدم خطوة للامام

كفاية

الدول المتاخرة عنا سبقتنا بكتير قوى عارفين ليه السبب علشان المسئولين بيلعبوا

جيمز

والشعب بيولع المهم مايخسرش الجيم

نفسى

الشعب ياخد القرار ويقول لوزير المالية

Game Over

يعنى اللعبة انتهت وحان الان موعد تغييرك

.

.

الصور من جلسة يوم 17 مايو 2009 اثناء مناقشة

زيادة العلاوه الاجتماعية

.

.

عنوان البوست استوحيته من عند لماضــــــة

نوادر دكاترة الجامعة

الموقف الأول

كلية الطب البيطرى

الدكتور واقف عمال يشرح فى المحاضرة وبيتكلم عن الحيوانات البرية وفجأة الباب بيخبط فى نص المحاضرة وإذا بفتاة ذات اثنان وعشرون ربيعاً ومائة وعشرون قنطاراً ترتدى الجينز على بلوفر صوف والشعر المسدل

الكتكوتة: ممكن أدخل يا دكتور لو سمحت أصلى أتأخرت شوية معلش

الدكتور : أتفضلى

الكتكوتة: بم بررم بررم ........... تتهادى فى مشيتها بين المنصة وبين المدرجات

الدكتور: وطبعاً زى ما احنا شايفين ده درس عملى بيوضحلنا مشية الفيل

------------------------------------------------

الموقف الثانى

كلية طب الأسنان

الدكتور واقف عمال يشرح على المنصة وفجأة الباب الورانى بيتفتح وحتة دين مزة بتدخل

طبعاً الدكتور تنح لما لقاها لابسة بلوزة مفتوحة من على الصدر ولابسة سلسلة على شكل طيارة

المزة: لما لقت الدكتور متنح

إيه يا دكتور عاجباك الطيارة

الدكتور: لأ طبعاً أنا عاجبنى المطار

------------------------------------------------

الموقف الثالث

إحدى كليات الهندسة

فى إحدى حصص الرسم الهندسى جت طالبة تانية بتورى الدكتور الرسم بتاعها وكان عبارة عن تصميم لمنزل بكل أبعاده

الدكتور: إنتى عاملة قطر قاعدة الحمام كام يا حبيبتى

الناصحة: 10 سم يا دكتور

الدكتور: ليه يا بنتى هوا إحنا هانشن

------------------------------------------------

الموقف الرابع

إحدى كليات الهندسة

وبرضه فى إحدى حصص الرسم الهندسى جت طالبة بتورى الدكتور الرسم بتاعها وكان عبارة عن تصميم لمنزل بكل أبعاده

الدكتور: إنتى عاملة قاعدة الحمام إيه يا شاطرة

الناصحة: أستانلس ستيل يا دكتور

الدكتور: ليه يا بنتى حرام عليكى هوا إحنا بنطرطش مية نار

هههههههههههههههههههههه

من رغيف العيش لقرص الدواء يا قلبى لا تحزن 2

مبدئياً كده

أقسم بالله العظيم إنى أقول الحق


بسم الله

هيييييييييييييه

ثانياً مصنع الدواء فى مصر المحروسة

طبعاً أنا سبت شغلى فى المطحن بعد ما دبيت ستوميت خناقة هناك علشان المرتب والمعاملة والذى منه وسافرت الإمارات أدور على شغل وطبعاً بعد نجاحى المبهر فى الإمارات _ راجع مغامرات ابن العزيزة فى بلادنا اللذيذة الجزء الأول و الثانى _ لقيت أبويا بيتصل بيا دولى وطبعاً دى حاجة استغربتلها جداً نظراً لفاتورة التليفون والميزانية والكلام اللى كلنا حافظينه ده بتاع الأبهات وبيقولى أرجع يا عواد بلدك محتاجاك وفتحوا هنا مصنع أدوية وجبتلك واسطة يالا


أرجع يا عبيط أرجع يا مجنون


وطبعاً زى أى شاب عبيط ومتفائــــــــــــــــــــــل رجعت على طول وقدمت ورقى فى المصنع ممهوراً بإمضاء من الواسطة إياها


والحمد لله أترفضت ولا طولت عنب الشام ولا بلح اليمن


المهم بعد سنة أتصلوا بيا قال إيه إنت أتقبلت فى المصنع وتعالى استلم وظيفتك

روحت يا أخويا دخلت المصنع وأنا داخل الإنتاج

حاجة كده إيه آخر آلاجة تقولش داخل مفاعل نووى حيطان مدهونة إيبوكسى من على اليمين وإزاز دوبلكس من على الشمال وأفتح باب ألاقى باب وأطلع من باب آلاقى كوريدور والأبواب كلها أستانلس حاجة كده بتاعة شغل بره ولازم تلبس بالطو وأوفر شوز وأوفر هد كمان

آه أومال ما أنا أصلى داخل الإنتاج بتاع مصنع الأدوية وهشتغل مهندس صيانة كمان


أفرحى يا أما وقومى أرقصى يا عدلات


ولولولولولولولولووووووووووووووووووووى


والله وباضتلك فى القفص ياد يا ميخو


وأول حاجة شفتها لقيت غندورة ماشية بشبشب حمام أبو صباع وجره وراها كيس زبالة كبير قوى وجاية من جوه ورايحة ناحية المغسلة

قلت يا واد طنش خالص

يمكن ميكونش هوا ده الإنتاج

شوية وألاقى كل البنات لابسين شباشب وماشيين جوه بيضحكوا ويهزروا مع بعض

قلت يا واد طنش خالص

يمكن النهاردة نظافة بس أو الفن داى بتاعهم

شوية وأسمع صوت مكنة شغالة وواقف عليها ناس إيديهم فيها شحم وزيت

قلت يا واد طنش خالص

يمكن بيعملوا صيانة

إنما ألاقيهم بيعبوا أقراص فى الشرايط بمناظرهم دى أهو ده اللى لايمكن أبداً

وماسكين مقشة بيكنسوا بيها الأقراص اللى وقعت على الأرض علشان يعبوها تانى سي تا إيمبوسيبل

فينك يا عواد

غطينى وصوتى عليا يا أما

وللحديث يقية

من رغيف العيش لقرص الدواء يا قلبى لا تحزن 1

تحديث

أنا مش عارف يا جماعة الصراحة مصطفى بكرى عامله قلبان ليه ولا أكنه جاب الديب من ديله فى حكاية القمح البايظ ده الكلام اللى أنا قلته فى البوست ده من سنة 2004 يعنى بقاله 5 سنين على الأقل شغال والقمح الفاسد اللى بيجلنا من روسيا من زمان قوى

ده كمية السوس اللى فى القمح كنا بنتريق عليها أنا وزمايلى ونقول إنت سوسة وأنا سوسة إنت قمحة وأنا قمحة زى عادل إمام وشيرين كده

ده الواحد كان طول ما هو فى المطحن عمال يهرش وماشى فى الشارع بيهرش وبيروح البيت بيهرش

ده الحاجة أمى ربنا يديها الصحة كانت بتكره اليوم اللى كنت بديلها فيه هدوم الشغل علشان تغسلها

وكانت تحطها لوحدها فى الغسالة بعد نقعها طبعاً

بس صدقونى المطحن ده كان بيوزع لجميع الأفران الممتازة اللى فى المحافظة وكانت الأفران شغالة زى الفل

المصيبة مش فى كده وبس

المصيبة كمان فى كمية المحسنات اللى كنا بنحطها فى الدقيق علشان لما يتخبز يتخمر بسرعة ويشرب مية ويرمى وزن

يعنى من الآخر

كنا بنضيف محسنات المفروض إنها تنضاف بكميات محسوبة علشان السرطانات والأمراض دى

بس إبقى سلملى على خالتك محسوبة

.

.

.

بصوا يا أخوانا بحكم عملى اللى هو يعنى مهندس كهرباء

أشتغلت فى مطحن دقيق وفى مصنع دواء

والصراحة لقيت إن مفيش أى اختلاف بين الاتنين فى أى حاجة نهائى لإن الاتنين بالظبط ما فرقوش عن أى مجزر أو سلخانة وذلك للأسباب التالية:

أولاً: المطحن

فى نوعين يا جماعة من الدقيق

دقيق بلدى اللى هو بتاع العيش البلدى وده بيتعمل من القمح البلدى المصرى وبيسموه دقيق 82% النسبة الرسمية

دقيق فاخر اللى هو بتاع العيش الفينو والمخبوزات وده بيتعمل من القمح المستورد وبيسموه دقيق 72% النسبة الرسمية برضه

والنسبة الرسمية دى تبقى نسبة استخراج الدقيق من حبة القمح

أنا بقى أشتغلت فى مطحن دقيق فاخر أو المفروض إنه فاخر

طبعاً بعد ما بنطحن القمح بنحفظه فى صوامع لمدة يوم أو اتنين والصومعة بيبقى طولها حوالى 20 متر وعرضها حوالى ستة متر

المهم الدقيق ده علشان طبعاً نسبة الرطوبة اللى فيه بيحجر جوه الصومعة ومش بينزل فى التعبئة نعمل إيه بقى

بنستعين باتنين أصدقاء

عواد وعم جمال

دول بقى من عمال التعبئة

مش عاوز أقولكم يا جماعة لبسهم بيبقى عامل إزاى يعنى بس المهم إنكم تعرفوا إنهم بيلبسوا اللبس ده يومياً وبيخشوا بيه الحمام ويمسحوا سلالم المطحن ولو حد فيهم مزنوق بيمسح مناخيره والله أعلم إيه تانى

آه وبيبقوا قاعدين حافيين

يعنى بيبقوا رمز من رموز مصر

أول ما يقولولى إلحق يا باشمهندس الصومعة علقت أقوله طب قابلنى فوق بقى يا عواد

يجيلى عم عواد ده بعد أنا ما أكون جهزت الونش وهو عبارة عن موتور بأربع قواعد وفيه وير وحزام بنلبسه للعامل ده علشان ينزل يفك الصومعة وبيبقى معاه عدة زى دى

ينزل بقى عمنا عواد ده ومعاه الجاروف اللى فوق ده بس طبعاً شتان بين جاروفنا وجاروفهم ههههههههههههه ويركن على الدقيق برجليه وهاتك يا خبط فى جدران الصومعة علشان ينزل الدقيق وينزل هوه بقى يتمشى عليه وطبعاً الصومعة مقفولة فبيعرق طب وعرقه بيروح فين؟؟؟؟

غبار الدقيق بيخش فى مناخيره فطبعاً لازم ينف

هايطلع منديل ورق ينف فيه يعنى

إيمبوسيبل

طبعاً بينف على الدقيق وبيعرق وبي..... وكل حاجة ممكن تتخيلوها هو ممكن يعملها جوه الصومعة بتاعة الدقيق اللى نازلة مباشرة على التعبئة

آه نسيت أقولكم إن باب الصومعة بيبقى فى الدور الخامس والتعبئة فى الأرضى يعنى لما بيطلعلى فوق بيكون عدى على خمس أدوار بسلالمهم وهو حافى سعادتك



وبالطريقة دى وبالمنظر ده وبالهنا والشفا



لما ييجى تفتيش بقى من التموين

هههههههههههههههههههههههه

عسل والله قال تفتيش قال



دول بقى يتصلوا يقولوا احنا جايين النهاردة

تلاقى أجدعها سفرة أتنصبت وأكل بقى من أجدعها مطعم كباب وكفتة وأظرف

الواحد منهم تجيلوا الدفاتر يمضيها ونكون احنا طبعاً محضرين عينات من بتاعت الوزارة ياخدوها هى كمان

وكل واحد فيهم ظرف وشوال

ظرف طبعاً فيه المعلوم وشوال دقيق ليه وللأسرة الكريمة



آه نسيت برضه أقول أصل أنا نساى قوى الدقيق الفاخر الفعلى بيكون استخراجه حوالى من 80 - 85 % بس



إنما بقى فى إحدى مطاحن القطاع العام بتاعت العيش البلدى فكفاية قوى إنى أقولكم الخبر السعيد ده

فيه واحد اختفى من المطحن لمدة تلات أيام وإذ فجأةً لقوا الشبشب بتاعه نازلهم فى شوال وهما بيعبوا يعنى بصريح العبارة الراجل وقع فى الصومعة وفضل فيها تلات أيام لحد ما جسمه أتحلل من السخونة وعبوه فى شوالات



يعنى مش بعيد وإنت بتاكلك رغيف كده ولا حاجة تلاقى ضفره أتحشر فى زورك

وتبقى من أكلة ضوافر البشر



ولا عزاء للمصريين

رأى عربى حر ، وجهان لعمة واحدة

النهاردة يا جدعان أنا هاتكلم عن خطاب السيد المحترم / نتنياهو ذو الشخصية القوية والحاكم بأمره

توصيات نتنياهو كده على السريع

أولاً

إقامة دولة فلسطينية منزوعة السلاح

ثانياً

الأعتراف بالدولة الإسرائيلية اليهودية

ثالثاً

عدم عودة اللاجئين إلى الأراضى المتبقية للفلسطينيين

توصياتى انا بقى كده على السريع

بالنسبة لأولاً

نعمل دولة فلسطينية أرخبيلية يعنى تتكون من عدة تجمعات فى العديد من دول العالم أكنها جزر يعنى ويكون مقرها فى جزيرة نائية فى المحيط القطبى الجنوبى

بالنسبة لثانياً

الاعتراف ببنت الخطيئة اللى هيه الدولة الإسرائيلية وأمه تبقى الدول العربية وأبوه أمريكا معلش المفروض يبقى العكس بس لقيتها مش هاتبقى معبرة

بالنسبة لثالثاً

انظر الوصية الأولى

والسلام عليكم ورحمة الله وبركاته

.

.

مغامرات ابن العزيزة فى بلادنا اللذيذة 2

الإمارات العربية المتحدة


تهنئة فى جميع الجرائد الرسمية الموسمية منها والصيفية لفتاة إماراتية ؟؟

طبعاً يا أخوانا أنا كان بقالى فى البلد الحلوة المشمشية دى شهرين بدور على شغل كل يوم أجيب كل الجرايد المكتوبة بالعربى وأقعد أقرا الإعلانات علشان الوظايف المطلوبة
الصراحة كنت عاوز آلاقى أى شغلانة بس ما أرجعش اسم النبى حارسها المحروسة تانى
مرجعش بخفى حنين يعنى
خالى أخدنى بالعربية ونزلنا دخلنا مول كده قال إيه بيفسحنى عسل خالى ده والله المفروض يفسحنى على طريقة ريا وسكينة كان أكرملى والله من البلوة اللى انا كنت فيها دى كانت أيام سودة الله لا يرجعها المهم جبنا الجرايد وركبنا العربية وأنا بقى حالتى النفسية فى الحضيض وأفتح يا خويا الجرنان آلاقى فى تانى صفحة إيه بقى

الأمير مين ابن مش عارف مين ابن مين يهنئ الشيخ برضه مين مش فاكر ويهنئ أمير البلاد
وتالت صفحة نفس الكلام
والرابعة برضه نفس الكلام
تقريباً كده الجرنان كله
وصفحة كبيرة فى نص الجرنان الصفحة كلها صورة لواحدة بنت

قلت أنا غلطت ولا حاجة
مسكت جرنان تانى نفس الكلام
وتالت نفس الكلام

عارفين بقى مين دى
مع الوضع فى الاعتبار إن الكلام ده كان فى شهر فبراير 2005 يعنى بعد القرن الواحد والعشرين بخمس سنين

بسلامتها


أول من يحصل على بكالوريوس الطب البيطرى فى تاريخ

دولة الإمارات العربية المتحدة


آه والله
تخيلوا
لحد سنة 2005 مكنش عندهم ولا واحد فى تاريخ الدولة معاه بكالوريوس الطب البيطرى
ودى بقى خريجة جامعة القاهرة
يعنى احنا عندنا الطب البيطرى شوفوا من سنة كام
وعندنا كام خريج

وبنروح نشتغل عند البشر دى
شوفتم بقى حكوتنا الرشيدة وصلت بينا لأنهى مستوى بين البشر
مش المفروض احنا نكون أسياد الناس دى
لكن للأسف اللى بيحصل
إنهم بيعاملونا أكننا بشر درجة عاشرة والله ولا العبيد بنظام الكفيل ده
وعلى فكرة بيقرفوا من المصريين جداً
تحس إنهم بيشمئزوا منهم كده
آه والله

بس الصراحة
أشكال المصريين اللى قابلتها بره مصر
منهم 60% فضيحة والباقى كويسين

أدونى رأيكم بقى فى المهازل دى
وإزاى ممكن نخلص من الحكاية دى
إزاى نقدر نغير الصورة
.
.

المغامرة الجاية
لما بكيت بسبب واحد هندى؟؟
.
.

كام مرة قابلت ناس فى حياتك بالشكل ده؟؟؟

.

.

.

الصرخة

أكتب هذه الكلمات الآن بعد أنا تعرضت لتجربة اغتصاب كما وصفتها الأديبة آيوشة فى مدونتها تخاريف وأحاسيس عيوشة أكتب هذه الكلمات الآن بعد أن تجاوزت الساعة الثانية والنصف بعد منتصف الليل وها أنا ذا أجلس وحيداً ذليلاً ضعيفاً لا اقوى على الحراك أشعر بغصة فى حلقى أشعر بغضاضة فى نفسى ليس لها مثيل


فلماذا أجس وحيداً ذليلاً هكذا


لماذا كلما وضعت الطعام لا أجد من يشاركنى إياه فأظل أذكر تلك اللحظات التى قضيتها مع زوجتى رحيق حياتى كلما تشاركنا طعامنا معاً فأنغمس فى تلك الذكريات حتى يفقد الطعام شهوته فأضع أولى لقيماتى فى فمى طامعاً بأن أتزوق طعم الحياة فإذا به طعم غص مرير تفوح منه رائحة الوحدة تلك الرائحة الكريهة المنفرة التى تشعرك وكأنك غير مرغوب فيك فى هذه الحياة قد لفظتك الدنيا لتسقط صريعاً بين يدى اليأس والإحباط كما قالت الأديبة آيوشة.



لماذا أجلس وحيداً


فى بلد ليس لى فيها أم ولا أب ولا زوجة ولا أخ فى بلد رحلت إليها مكرهاً ليس طمعاً فى تحسين مستوى المعشة بل طمعاً فى المعيشة نفسها ولكن .... وآآآآآآآآآآآآآآآآآآآه من لكن هذه


هل تسوى الغربة كل هذا العناء

وانا الذى كلما ضاقت بى الحياة كنت أجرى مهرولاً إلى أمى لأدفن رأسى فى صدرها ولتربت هى على ظهرى بيدها ويدها الأخرى تجرى منسلة بين خصلات شعرى وأبكى .... لا وربى لم يكن هذا بكاءاً بل كان إنهياراً بل كانت دموعى تنهمر كالشلالات لتصب فى نهر الحنان الذى غمرتنى به أمى فلا يمتلئ هذا النهر أبداً على الرغم من غزارة الماء ولو استمر هذا الماء إلى أبد الآبدين ما أمتلأ النهر أبداً بل زاد من قدرته على استيعاب الماء المنهمر وكانت أمى تردد آيات من القرآن فى أذنى وتسمعنى تلك الكمات (أنا عارفة يابنى إنك تعبت كتير فى الدنيا بس معلش يابنى أستحمل وإن شاء ربنا هايكرمك آخر كرم وتبقى تقول أمى قالت) نعم أمى قالت وصدقها الله لقد أكرمنى الله بزوجة لم أكن لأحلم بمثلها فى يوم من الأيام فهى تفوق أحلامى كشاب يطمح إلى الكمال

ولكن ...... وآآآآآآآآه من لكن هذه

أين هى الأم الآن وأين هى الزوجة بل أين هو الصديق فى بلد تحول كل سكانه إلى تماثيل جوفاء خالية من المشاعر لا يأبه من به إلا لنفسه أين هم جيرانى أين هم أصدقائى أين هى جلسات السمر التى كانت تجمعنى بالأصدقاء أين هم هؤلاء الأصدقاء الذين كانوا يهرعون لنجدتى إذا فقط شعروا إننى لست على ما يرام وكانوا لا يتركوننى إلا وقد علت ضحكاتى معلنة للحياة إننى أسخر منها وإنها صغيرة هينة وقد من الله علي بمثل هؤلاء الأصدقاء

آآآآآآآآآآآآآآه من الغربة فقد جرحتنى بقساوتها جرحتنى جرحاً لا يندمل ولا تنسنيه الأيام وكل من يرى وجهى يرى فيه تلك الصورة المنعكسة من المرآة المكسورة

والله يا مصر لولا أن حكامك أخرجونى منك ما خرجت

آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآه