من رغيف العيش لقرص الدواء يا قلبى لا تحزن 2

مبدئياً كده

أقسم بالله العظيم إنى أقول الحق


بسم الله

هيييييييييييييه

ثانياً مصنع الدواء فى مصر المحروسة

طبعاً أنا سبت شغلى فى المطحن بعد ما دبيت ستوميت خناقة هناك علشان المرتب والمعاملة والذى منه وسافرت الإمارات أدور على شغل وطبعاً بعد نجاحى المبهر فى الإمارات _ راجع مغامرات ابن العزيزة فى بلادنا اللذيذة الجزء الأول و الثانى _ لقيت أبويا بيتصل بيا دولى وطبعاً دى حاجة استغربتلها جداً نظراً لفاتورة التليفون والميزانية والكلام اللى كلنا حافظينه ده بتاع الأبهات وبيقولى أرجع يا عواد بلدك محتاجاك وفتحوا هنا مصنع أدوية وجبتلك واسطة يالا


أرجع يا عبيط أرجع يا مجنون


وطبعاً زى أى شاب عبيط ومتفائــــــــــــــــــــــل رجعت على طول وقدمت ورقى فى المصنع ممهوراً بإمضاء من الواسطة إياها


والحمد لله أترفضت ولا طولت عنب الشام ولا بلح اليمن


المهم بعد سنة أتصلوا بيا قال إيه إنت أتقبلت فى المصنع وتعالى استلم وظيفتك

روحت يا أخويا دخلت المصنع وأنا داخل الإنتاج

حاجة كده إيه آخر آلاجة تقولش داخل مفاعل نووى حيطان مدهونة إيبوكسى من على اليمين وإزاز دوبلكس من على الشمال وأفتح باب ألاقى باب وأطلع من باب آلاقى كوريدور والأبواب كلها أستانلس حاجة كده بتاعة شغل بره ولازم تلبس بالطو وأوفر شوز وأوفر هد كمان

آه أومال ما أنا أصلى داخل الإنتاج بتاع مصنع الأدوية وهشتغل مهندس صيانة كمان


أفرحى يا أما وقومى أرقصى يا عدلات


ولولولولولولولولووووووووووووووووووووى


والله وباضتلك فى القفص ياد يا ميخو


وأول حاجة شفتها لقيت غندورة ماشية بشبشب حمام أبو صباع وجره وراها كيس زبالة كبير قوى وجاية من جوه ورايحة ناحية المغسلة

قلت يا واد طنش خالص

يمكن ميكونش هوا ده الإنتاج

شوية وألاقى كل البنات لابسين شباشب وماشيين جوه بيضحكوا ويهزروا مع بعض

قلت يا واد طنش خالص

يمكن النهاردة نظافة بس أو الفن داى بتاعهم

شوية وأسمع صوت مكنة شغالة وواقف عليها ناس إيديهم فيها شحم وزيت

قلت يا واد طنش خالص

يمكن بيعملوا صيانة

إنما ألاقيهم بيعبوا أقراص فى الشرايط بمناظرهم دى أهو ده اللى لايمكن أبداً

وماسكين مقشة بيكنسوا بيها الأقراص اللى وقعت على الأرض علشان يعبوها تانى سي تا إيمبوسيبل

فينك يا عواد

غطينى وصوتى عليا يا أما

وللحديث يقية

من رغيف العيش لقرص الدواء يا قلبى لا تحزن 1

تحديث

أنا مش عارف يا جماعة الصراحة مصطفى بكرى عامله قلبان ليه ولا أكنه جاب الديب من ديله فى حكاية القمح البايظ ده الكلام اللى أنا قلته فى البوست ده من سنة 2004 يعنى بقاله 5 سنين على الأقل شغال والقمح الفاسد اللى بيجلنا من روسيا من زمان قوى

ده كمية السوس اللى فى القمح كنا بنتريق عليها أنا وزمايلى ونقول إنت سوسة وأنا سوسة إنت قمحة وأنا قمحة زى عادل إمام وشيرين كده

ده الواحد كان طول ما هو فى المطحن عمال يهرش وماشى فى الشارع بيهرش وبيروح البيت بيهرش

ده الحاجة أمى ربنا يديها الصحة كانت بتكره اليوم اللى كنت بديلها فيه هدوم الشغل علشان تغسلها

وكانت تحطها لوحدها فى الغسالة بعد نقعها طبعاً

بس صدقونى المطحن ده كان بيوزع لجميع الأفران الممتازة اللى فى المحافظة وكانت الأفران شغالة زى الفل

المصيبة مش فى كده وبس

المصيبة كمان فى كمية المحسنات اللى كنا بنحطها فى الدقيق علشان لما يتخبز يتخمر بسرعة ويشرب مية ويرمى وزن

يعنى من الآخر

كنا بنضيف محسنات المفروض إنها تنضاف بكميات محسوبة علشان السرطانات والأمراض دى

بس إبقى سلملى على خالتك محسوبة

.

.

.

بصوا يا أخوانا بحكم عملى اللى هو يعنى مهندس كهرباء

أشتغلت فى مطحن دقيق وفى مصنع دواء

والصراحة لقيت إن مفيش أى اختلاف بين الاتنين فى أى حاجة نهائى لإن الاتنين بالظبط ما فرقوش عن أى مجزر أو سلخانة وذلك للأسباب التالية:

أولاً: المطحن

فى نوعين يا جماعة من الدقيق

دقيق بلدى اللى هو بتاع العيش البلدى وده بيتعمل من القمح البلدى المصرى وبيسموه دقيق 82% النسبة الرسمية

دقيق فاخر اللى هو بتاع العيش الفينو والمخبوزات وده بيتعمل من القمح المستورد وبيسموه دقيق 72% النسبة الرسمية برضه

والنسبة الرسمية دى تبقى نسبة استخراج الدقيق من حبة القمح

أنا بقى أشتغلت فى مطحن دقيق فاخر أو المفروض إنه فاخر

طبعاً بعد ما بنطحن القمح بنحفظه فى صوامع لمدة يوم أو اتنين والصومعة بيبقى طولها حوالى 20 متر وعرضها حوالى ستة متر

المهم الدقيق ده علشان طبعاً نسبة الرطوبة اللى فيه بيحجر جوه الصومعة ومش بينزل فى التعبئة نعمل إيه بقى

بنستعين باتنين أصدقاء

عواد وعم جمال

دول بقى من عمال التعبئة

مش عاوز أقولكم يا جماعة لبسهم بيبقى عامل إزاى يعنى بس المهم إنكم تعرفوا إنهم بيلبسوا اللبس ده يومياً وبيخشوا بيه الحمام ويمسحوا سلالم المطحن ولو حد فيهم مزنوق بيمسح مناخيره والله أعلم إيه تانى

آه وبيبقوا قاعدين حافيين

يعنى بيبقوا رمز من رموز مصر

أول ما يقولولى إلحق يا باشمهندس الصومعة علقت أقوله طب قابلنى فوق بقى يا عواد

يجيلى عم عواد ده بعد أنا ما أكون جهزت الونش وهو عبارة عن موتور بأربع قواعد وفيه وير وحزام بنلبسه للعامل ده علشان ينزل يفك الصومعة وبيبقى معاه عدة زى دى

ينزل بقى عمنا عواد ده ومعاه الجاروف اللى فوق ده بس طبعاً شتان بين جاروفنا وجاروفهم ههههههههههههه ويركن على الدقيق برجليه وهاتك يا خبط فى جدران الصومعة علشان ينزل الدقيق وينزل هوه بقى يتمشى عليه وطبعاً الصومعة مقفولة فبيعرق طب وعرقه بيروح فين؟؟؟؟

غبار الدقيق بيخش فى مناخيره فطبعاً لازم ينف

هايطلع منديل ورق ينف فيه يعنى

إيمبوسيبل

طبعاً بينف على الدقيق وبيعرق وبي..... وكل حاجة ممكن تتخيلوها هو ممكن يعملها جوه الصومعة بتاعة الدقيق اللى نازلة مباشرة على التعبئة

آه نسيت أقولكم إن باب الصومعة بيبقى فى الدور الخامس والتعبئة فى الأرضى يعنى لما بيطلعلى فوق بيكون عدى على خمس أدوار بسلالمهم وهو حافى سعادتك



وبالطريقة دى وبالمنظر ده وبالهنا والشفا



لما ييجى تفتيش بقى من التموين

هههههههههههههههههههههههه

عسل والله قال تفتيش قال



دول بقى يتصلوا يقولوا احنا جايين النهاردة

تلاقى أجدعها سفرة أتنصبت وأكل بقى من أجدعها مطعم كباب وكفتة وأظرف

الواحد منهم تجيلوا الدفاتر يمضيها ونكون احنا طبعاً محضرين عينات من بتاعت الوزارة ياخدوها هى كمان

وكل واحد فيهم ظرف وشوال

ظرف طبعاً فيه المعلوم وشوال دقيق ليه وللأسرة الكريمة



آه نسيت برضه أقول أصل أنا نساى قوى الدقيق الفاخر الفعلى بيكون استخراجه حوالى من 80 - 85 % بس



إنما بقى فى إحدى مطاحن القطاع العام بتاعت العيش البلدى فكفاية قوى إنى أقولكم الخبر السعيد ده

فيه واحد اختفى من المطحن لمدة تلات أيام وإذ فجأةً لقوا الشبشب بتاعه نازلهم فى شوال وهما بيعبوا يعنى بصريح العبارة الراجل وقع فى الصومعة وفضل فيها تلات أيام لحد ما جسمه أتحلل من السخونة وعبوه فى شوالات



يعنى مش بعيد وإنت بتاكلك رغيف كده ولا حاجة تلاقى ضفره أتحشر فى زورك

وتبقى من أكلة ضوافر البشر



ولا عزاء للمصريين

رأى عربى حر ، وجهان لعمة واحدة

النهاردة يا جدعان أنا هاتكلم عن خطاب السيد المحترم / نتنياهو ذو الشخصية القوية والحاكم بأمره

توصيات نتنياهو كده على السريع

أولاً

إقامة دولة فلسطينية منزوعة السلاح

ثانياً

الأعتراف بالدولة الإسرائيلية اليهودية

ثالثاً

عدم عودة اللاجئين إلى الأراضى المتبقية للفلسطينيين

توصياتى انا بقى كده على السريع

بالنسبة لأولاً

نعمل دولة فلسطينية أرخبيلية يعنى تتكون من عدة تجمعات فى العديد من دول العالم أكنها جزر يعنى ويكون مقرها فى جزيرة نائية فى المحيط القطبى الجنوبى

بالنسبة لثانياً

الاعتراف ببنت الخطيئة اللى هيه الدولة الإسرائيلية وأمه تبقى الدول العربية وأبوه أمريكا معلش المفروض يبقى العكس بس لقيتها مش هاتبقى معبرة

بالنسبة لثالثاً

انظر الوصية الأولى

والسلام عليكم ورحمة الله وبركاته

.

.

مغامرات ابن العزيزة فى بلادنا اللذيذة 2

الإمارات العربية المتحدة


تهنئة فى جميع الجرائد الرسمية الموسمية منها والصيفية لفتاة إماراتية ؟؟

طبعاً يا أخوانا أنا كان بقالى فى البلد الحلوة المشمشية دى شهرين بدور على شغل كل يوم أجيب كل الجرايد المكتوبة بالعربى وأقعد أقرا الإعلانات علشان الوظايف المطلوبة
الصراحة كنت عاوز آلاقى أى شغلانة بس ما أرجعش اسم النبى حارسها المحروسة تانى
مرجعش بخفى حنين يعنى
خالى أخدنى بالعربية ونزلنا دخلنا مول كده قال إيه بيفسحنى عسل خالى ده والله المفروض يفسحنى على طريقة ريا وسكينة كان أكرملى والله من البلوة اللى انا كنت فيها دى كانت أيام سودة الله لا يرجعها المهم جبنا الجرايد وركبنا العربية وأنا بقى حالتى النفسية فى الحضيض وأفتح يا خويا الجرنان آلاقى فى تانى صفحة إيه بقى

الأمير مين ابن مش عارف مين ابن مين يهنئ الشيخ برضه مين مش فاكر ويهنئ أمير البلاد
وتالت صفحة نفس الكلام
والرابعة برضه نفس الكلام
تقريباً كده الجرنان كله
وصفحة كبيرة فى نص الجرنان الصفحة كلها صورة لواحدة بنت

قلت أنا غلطت ولا حاجة
مسكت جرنان تانى نفس الكلام
وتالت نفس الكلام

عارفين بقى مين دى
مع الوضع فى الاعتبار إن الكلام ده كان فى شهر فبراير 2005 يعنى بعد القرن الواحد والعشرين بخمس سنين

بسلامتها


أول من يحصل على بكالوريوس الطب البيطرى فى تاريخ

دولة الإمارات العربية المتحدة


آه والله
تخيلوا
لحد سنة 2005 مكنش عندهم ولا واحد فى تاريخ الدولة معاه بكالوريوس الطب البيطرى
ودى بقى خريجة جامعة القاهرة
يعنى احنا عندنا الطب البيطرى شوفوا من سنة كام
وعندنا كام خريج

وبنروح نشتغل عند البشر دى
شوفتم بقى حكوتنا الرشيدة وصلت بينا لأنهى مستوى بين البشر
مش المفروض احنا نكون أسياد الناس دى
لكن للأسف اللى بيحصل
إنهم بيعاملونا أكننا بشر درجة عاشرة والله ولا العبيد بنظام الكفيل ده
وعلى فكرة بيقرفوا من المصريين جداً
تحس إنهم بيشمئزوا منهم كده
آه والله

بس الصراحة
أشكال المصريين اللى قابلتها بره مصر
منهم 60% فضيحة والباقى كويسين

أدونى رأيكم بقى فى المهازل دى
وإزاى ممكن نخلص من الحكاية دى
إزاى نقدر نغير الصورة
.
.

المغامرة الجاية
لما بكيت بسبب واحد هندى؟؟
.
.

كام مرة قابلت ناس فى حياتك بالشكل ده؟؟؟

.

.

.

الصرخة

أكتب هذه الكلمات الآن بعد أنا تعرضت لتجربة اغتصاب كما وصفتها الأديبة آيوشة فى مدونتها تخاريف وأحاسيس عيوشة أكتب هذه الكلمات الآن بعد أن تجاوزت الساعة الثانية والنصف بعد منتصف الليل وها أنا ذا أجلس وحيداً ذليلاً ضعيفاً لا اقوى على الحراك أشعر بغصة فى حلقى أشعر بغضاضة فى نفسى ليس لها مثيل


فلماذا أجس وحيداً ذليلاً هكذا


لماذا كلما وضعت الطعام لا أجد من يشاركنى إياه فأظل أذكر تلك اللحظات التى قضيتها مع زوجتى رحيق حياتى كلما تشاركنا طعامنا معاً فأنغمس فى تلك الذكريات حتى يفقد الطعام شهوته فأضع أولى لقيماتى فى فمى طامعاً بأن أتزوق طعم الحياة فإذا به طعم غص مرير تفوح منه رائحة الوحدة تلك الرائحة الكريهة المنفرة التى تشعرك وكأنك غير مرغوب فيك فى هذه الحياة قد لفظتك الدنيا لتسقط صريعاً بين يدى اليأس والإحباط كما قالت الأديبة آيوشة.



لماذا أجلس وحيداً


فى بلد ليس لى فيها أم ولا أب ولا زوجة ولا أخ فى بلد رحلت إليها مكرهاً ليس طمعاً فى تحسين مستوى المعشة بل طمعاً فى المعيشة نفسها ولكن .... وآآآآآآآآآآآآآآآآآآآه من لكن هذه


هل تسوى الغربة كل هذا العناء

وانا الذى كلما ضاقت بى الحياة كنت أجرى مهرولاً إلى أمى لأدفن رأسى فى صدرها ولتربت هى على ظهرى بيدها ويدها الأخرى تجرى منسلة بين خصلات شعرى وأبكى .... لا وربى لم يكن هذا بكاءاً بل كان إنهياراً بل كانت دموعى تنهمر كالشلالات لتصب فى نهر الحنان الذى غمرتنى به أمى فلا يمتلئ هذا النهر أبداً على الرغم من غزارة الماء ولو استمر هذا الماء إلى أبد الآبدين ما أمتلأ النهر أبداً بل زاد من قدرته على استيعاب الماء المنهمر وكانت أمى تردد آيات من القرآن فى أذنى وتسمعنى تلك الكمات (أنا عارفة يابنى إنك تعبت كتير فى الدنيا بس معلش يابنى أستحمل وإن شاء ربنا هايكرمك آخر كرم وتبقى تقول أمى قالت) نعم أمى قالت وصدقها الله لقد أكرمنى الله بزوجة لم أكن لأحلم بمثلها فى يوم من الأيام فهى تفوق أحلامى كشاب يطمح إلى الكمال

ولكن ...... وآآآآآآآآه من لكن هذه

أين هى الأم الآن وأين هى الزوجة بل أين هو الصديق فى بلد تحول كل سكانه إلى تماثيل جوفاء خالية من المشاعر لا يأبه من به إلا لنفسه أين هم جيرانى أين هم أصدقائى أين هى جلسات السمر التى كانت تجمعنى بالأصدقاء أين هم هؤلاء الأصدقاء الذين كانوا يهرعون لنجدتى إذا فقط شعروا إننى لست على ما يرام وكانوا لا يتركوننى إلا وقد علت ضحكاتى معلنة للحياة إننى أسخر منها وإنها صغيرة هينة وقد من الله علي بمثل هؤلاء الأصدقاء

آآآآآآآآآآآآآآه من الغربة فقد جرحتنى بقساوتها جرحتنى جرحاً لا يندمل ولا تنسنيه الأيام وكل من يرى وجهى يرى فيه تلك الصورة المنعكسة من المرآة المكسورة

والله يا مصر لولا أن حكامك أخرجونى منك ما خرجت

آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآه

الخنزير ولا الفرخة

فاكرين إنفلونزا الطيور

مصر كانت من آخر الدول اللى دخلت فيها إنفلونزا الطيور

بس دلوقتى الحمد لله ... الحمد لله وبفضل الجهود المبذولة من حكومتنا الرشيدة بقت من أعلى الدول فى نسبة الإصابة بإنفلونزا الطيور

تفتكر إنفلونزا الخنازير هاتمشى على نفس الخط وخصوصاً إنها أخطر ومش بيحوق معاها التاميفلو ده؟؟؟

طبعاً الصورة اللى فوق دى من أرشيف صديق عمرى (وأذكى شخصية قابلتها فى حياتى بدون منازع)

الدكتور / إبراهيم أحمد عبد اللطيف

إبراهيم كان زميلى الأنتيم فى ثالتة ورابعة إبتدائى وللأسف كنت أنا أشطر واحد فى المدرسة لحد ما شرف بسعادته مسحنى بأستيكة...هاحكيلكم عنه شوية

أولاً: هو اللى علم الأبلة نعمات الله يمسيها بالخير إزاى تعرف تحل الكلمات المتقاطعة لما كنا فى تالتة إبتدائى وكان السؤال هو احد رواة الحديث والحل طبعاً هو اللى قاله وكان أبو هريرة وهو اللى كان بيعلم أستاذ الرسم إزاى يرسم آه والله فى تالتة إبتدائى (معجزة مش كده) وكان بيرسم الكورة بشكل غريب قوى كلها أشكال سداسية مشبوكة فى بعضها وفى الآخر تبقى كورة إزاى معرفش...وكان بيكتب بالآتى عدوا معايا وصلوا على الحبيب:

1- خط النسخ

2- خط الرقعة

3- خط الثلث

4- الخط الديوانى

5- الخط الكوفى

والله العظيم كل ده فى تالتة إبتدائى ولما كبر كان بيرسم كاريكتير ويبعته الأخبار ومجلة فلاش...وكان فى الشطرنج حكاية وهو اللى حاول يعلمنى إزاى أمسك قلم وفرشة وأرسم وألون والحمد لله فشلت فشل ذريع

يا ريت تخشوا تشوفوا رسوماته على الفيس بوك وندى لهذا الشاب المعجزة حقه اللى ما أخدهوش وهو صغير علشان هو وحشنى جداً و لسه محتفظ بالبورتريه اللى رسمهولى غيابى وإحنا لسه عيال ومغلف الورقة دى ولسه معايا لحد النهارة.

.

,

Anonymous Influenza Virus

كام واحد من المدونين جاله إنفلونزا الإنيموس؟؟؟

ده أخطر مرض بيصيب المدونين

Anonymous says

وهاتك يا شتيمة على سبيل المثال لا الحصر

إيه القرف ده، إيه اللى إنت كاتبه ده، إيه التخريف ده،.......... إلخ إلخ إلخ وده أكتر كلام مؤدب حاولت أكتبه

أنا مش عارف إيه الناس دى وبتعمل كده ليه طب يا سيدى الإنيموس لو عاوز تنصحنى مايبقاش على الملأ لإن النصيحة على الملأ فضيحة وعندك الميل بتاعى يا عم على المدونة قبح فيه زى ما إنت عاوز بس بلاش قدام الناس علشان فيه ناس محترمة مابتحبش تقراه الكلام ده ولو كل ما هاتدخل على المدونة تلاقى عليها كلام قبيح مش هاتدخل تانى ولو عاوز تشتمنى يا عم فأحب أفكرك إن العيب لو طلع من أهل العيب مايبقاش عيب...

بس على العموم إنت إنسان جبان لإنك بتضرب فى الضلمة وبتضرب فى الضهر لإنك أضعف من إنك تواجهنى فى وشى

يا جماعة أنا اتضايقت جداً من الإنيموس ده لإنى للأسف بلاقيه فى كل مدونة أدخلها وأخيراً لقيته عند نوارة نجم وعند بنت خيخة وأى كلام وأتضايقت جداً من اللى قريته.

علشان كده عندى ليكم رجاء

لما أى واحد مننا بيبقى قاعد كده فى بيته وبيتفرج على التليفزيون وجه أخوه الصغير ووقف قدامه هايعمل إيه؟؟؟

هايقوله أوعى كده يا رخم إنت ويكمل باقى الفيلم ..... صح؟؟؟

علشان كده يا أخوانا اللى يجيله إنفلونزا الإنيموس يحذف تعليقه ومايعبروش خالص بس يقول أنا كان عندى إنفولنزا وعالجتها الحمد لله لإنه لو عبره يبقى اداله قيمة وخلاه بنى آدم وهو أصلاً مايستاهلش وعاوزنا نتنرفز ونشتم علشان نبقى زيه مصابين بالإنفلونزا ولو عملنا كده يبقى هو اللى انتصر علينا واحنا اللى خسرنا....

مش كده ولا إيــــــــــــــــــــــــــــه!!!!

.

.

شهادة ميلاد أوباما

إلا هو ده يعتبر سبق صحفى على مستوى المدونات المصرية ؟؟؟؟

قصة حياة أوباما بالصور

الصور دى يا جدعان مش هاتلاقوها فى أى موقع تانى بالوضوح ده وهى بتحكى قصة حياة أوباما

أتفرجوا وسجلوا وأدعولى

تحياتى

الصور دى كلها مقتبسة من الموقع ده

.

.

مغامرات ابن العزيزة فى بلادنا اللذيذة 1

دولة

الإمارات العربية المتحدة

سنة 2002 لقيت العميد ماسكنى بمنديل ورق وشايلنى من جنب الحيط وهوب راح مدينى بالشلوت بره سور كلية الهندسة والحمد لله كان نعل الجزمة معلم فى البنطلون من ورا وتقريباً كده كان جيد.
وطبعاً حلمت زى أى مغفل فى دول الخليج وفلوسها وكانت هى دى بداية فتح الستارة على مسرح الحياة
فى 15/12/2004 أخدت الطيارة على الإمارات بعد طبعاً ماسلمت على كل الشعب تقريباً علشان آنى رايح الإمارات أشتغل (مع إنى كنت رايح فيزا زيارة) وطبعاً هارجع ومعايا الفلوس دى زكايب زكايب.
وأول ما الطيارة وصلت أرض المطار فى العين وحطيت رجلى بره الطيارة قلت (انا جيتلك يا بلد) هههههههههههه غلبان والله وأهباااااااااااااااااااال
بصوا بقى أنا متعود كل ما أكون ماشى لوحدى يعنى أقرا قرآن أو أسبح كده فى سرى طول ما أنا ماشى لكن فى الإمارات وفى العين بالتحديد قلت ليه يا واد تعمل كده ما تعمل حاجة أحسن وقلبت التسبيح من (سبحان الله وبحمده سبحان الله العظيم) وخليته (حسبى الله وهو نعم الوكيل فيك يا حسنى يا مبارك) وفضلت أقولها طول ما أنا ماشى وأول ما أوصل للمية ألف وأرجع تانى مش عارف إيه البواخة دى المهم أنا قلت آدينى بأذكر ربنا وبالمرة أدعى وآخد ثواب عن كل المصريين وده لما شوفت البلد هناك نظيفة أد إيه وإزاى الناس هناك بيتعاملوا كبنى آدمين مش حكومة بتعاملهم أكنهم حيوانات طفيليلة أقرب للحيوانات منهم لأشباه البنى آدمين..
المهم وصلت يوم الخميس والحمد لله خالى لزقنى فى شغلانة حلوة قوى ونزلتها من يوم السبت
شغلناة إيه بقى دى
(مراقب على امتحانات المنازل)

وما أدراك ما المنازل

مش احنا بنتريق على المنازل بتوع مصر ههههههههههه دول طلعوا عباقرة والنعمة ..... آه والله
عارفين النكتة بتاعت الصعيدى لما مات وجه خمس ملايكة يحاسبوه اتنين يحاسبوه وتلاتة يفهموه آهو انا بقى عشت النكتة دى بس مكنتش الصعيدى أنا كنت تبع الجماعة اللى بيفهموه والصعيدى هنا لعب دوره باقتدار أفراد الشعب الإماراتى الشقيق.
أصل يا جماعة هما هناك بيدوا اللى معاه الإبتدائية بتاع ست سبع تلاف درهم واللى معاه أولة إعدادى وشيك على العالى وشيك على الواطىبتاع عشرة تلاف درهم وكل ما تبعت أكتر كل ما فرصك فى الفوز تكتر.
فلقيت عندى يا جماعة ناس من سن 18 سنة وطالع ، طب والله كان عندى واحد 58 سنة مش عارف جاى يعمل إيه ولو نجح يعنى لا سمح الله هايدخلوه كلية إيه .. صبح صبح يا عم الحاج
المهم قعدت على ده الحال أسبوعين الصبح أدور على شغل وبعد الضهر أراقب على الامتحانات وبالليل أتنيل على عينى وعين أهلى اتمشى وأتحسبن...
وفى آخر الأسبوعين لقيت نفسى أتعقدت ودخلت فى حالة أكتئاب نفسى لحد ما حصلى حتة دين موقف هناك تحفة جاى فى السكة آهوه

هما عندهم البرشام ده حاجة عادية جداً بس هما بيسموه برشوم وده بقى عبارة عن حلول الامتحانات السابقة وأهم حاجة إنه يكون فيه رسومات لإنهم ولله الحمد مش بيعرفوا يقروا فبيعملوا إيه بقى يا حلوين بينقشوا الكتابة اللى على الرسمة من غير حتى ما يعرفوا السؤال لإنهم زى ما قلت مابيعرفوش يقروا منازل بقى وبيغشوا إزاى بقى!!!! .... هههههههههههههه
الأول البرشوم ده بيتباع فى المكتبات عادى جداً كده وبـ15 درهم بس للمادة وتلاقيهم حاطينه فى جيب الجلابية اليمين وكل شوية يطلع شوية ورق ويبص فيه ولو لقى رسمة زى اللى قدامه يركنها على جنب ويرجع باقى الورق فى جيب الجلابية الشمال علشان أصمله عليه ما يتلغبطش.... آه والله ده اللى بيحصل
المهم قبل ما أخلص كده بيومين وأنا بقى مشتحتف على شغل ومش لاقى لقيت واحد زى غزال كده فى طلعته البهية عارفينه طبعاً (غزغز) قاعد فى آخر اللجنة فى الصف الوسطانى وعمال يغش فا رحتله لسه بأمسك الورق لقيت صوت جاموسة (أمههههههههههه) مش عارف أكتب صوت الجاموسة ههههههههه زى إسماعيل ياسين فى الفيلم ولقيت حاجة كده بتقف قدامى ببطء وعينيه بتطأ شرار بينى وبينكم أنا عملتها على نفسى وقلت يا واد رحت فى شربة مية والعيال اللى فى اللجنة زعقولى وقالولى: دعه يا أستاذ، دعه ، دعه
رحت فى ثانية لقيت نفسى فى أول اللجنة وبارسم على وشى تلك الابتسامة المتخلفة مع شوية تناحة (أنظر الصورة) زى ما أتعلمت فى مصر بالظبط
وميلت على واحد فيهم وقلتله هو مين ده
قالى ما تعرفه أستاذ هذا الشيخ / محمد عبد الله
أيوه يعنى مين هو ؟؟؟؟ سؤال قمة فى التخلف والله
قالى: هذا مدير الكهرباء هنا فى العين

أن ان آآآآآآآآآآآآآآآآآآآآآآن

انزل بقى بموسيقى تصويرية وهات الكاميرا شوية عليا أيوه كده برافو عليك وركز بقى على وشى وانا حاطط إيدى اليمين وفيها المنديل على بقى وبمد إيدى الشمال قدامى ودموعى فى عينيا وبتشر على خدودى وبصرخ وأقول وأجعر زى الغول

وحوى يا وحوى أيوحاااااااااااااا

وكمان وحوى

أيوحااااااااااا

يا نهار أثود يا نهار أثود

مدير الكهرباء فرع العين جاى يمتحن عندى تالتة ثانوى... أعااااااااااااااااااااا

رحت طبعاً ضارب مارشليه وقلتله يا أوستاذ محمد (خالى بالكم من أوستاذ دى بعد ماكنت هادبسله الورقة قمة فى المارشليه والله) أنا مهندس كهرباء مصرى وبدور على شغل قالى خد رقم الجوال آهوه وعدى عليا فى المكتب لما أخلص الامتحانات
وبعد ما اللجنة خلصت صعبت عليا نفسى قوى والله قلت يا واد يا محمد (انا مش هو) بقى إنت عمال تطحن وأبوك عمال يصرف عليك بقاله عشرين سنة علشان تشتغل عند بأف زى ده والله عيب عليك؟؟؟ رحت مقطع الورقة وحلفت لأعاقب ابويا وأخليه يصرف عليا كما عشرين سنة تانيين ....ههههههههههههه

ونزلت منى دمعة على البهدلة اللى الحكومة بتاعتنا مبهدلهانا ودى كانت أول دمعة
وللدموع بقية انتظرونا.......

بقى يا عالم ينفع ناس كده يبصوا لنا نظرة حقيرة وفاكرين إنهم احسن مننا

إخص علينا

إخص

أخص لإننا رضينا بالذل والذل مرضيش بينا

قرف مننا

زهق

أوفففففففففففففففففففففففففففففففففففففف

على فكرة أنا أقسمت إنى أقول الحقيقة المحضة من غير حباشتكانات ولا حاجة ولو مكنتوش مصدقين استنوا لما تقروا باقى الحلقات....

فى الحلقة القادمة

تهنئة فى جميع الجرائد الرسمية الموسمية منها والصيفية لفتاة إماراتية لو عاوزين تعرفوا القضية استنونا الحلقة اللى جاية؟؟

.

.

قررررررررررررب قرب قرب قرب وطلع السنيورة

أنا لفيت فى تلات بلاد مصر والسعودية والإمارات

واسمحولى أقولكم الفرق البسيط اللى بينهم فى المخطط ده

وعلى فكرة الإمارات دى حتة من جهنم

والسعودية طبعاً سيرتها سابقاها

اما مصر دى بقى أم الدنيا وحبيبة قلبى
.

اضغط على الصورة للتكبير وبعد كده أقم التعليق

.

.

ابن الكُبة طلع القبة و ابن اسم الله خده الله

أولاً أشكر المدون الجامد قوى أحمد الصباغ اللى نزلنا الترجمة بتاعة المفوه أوباما بيه أبو المعاطى
وده بقى اللى قدرت أفهمه من الخطاب (الأزرق)
أول ما بدأها قال السلام عليكم علشان كل واحد يطرطأ ودانه كده ويفتحها أومال إيه علشان طبعاً احنا أول مرة نشوف واحد خواجة بيتكلم عربى علشان تعرفوا بس إن مدام لطيفة مكدبتش لما قالت الأرض بتتكلم عربى (لطيفة هاه مش نظيفة)
بدأ يخودنا على حجره آهوه يعنى معنى كلامه كده إن احنا ياعينى عليه وعلى اللى حواليه ناس غلابة متبهدلين واللى مبهدلانا الدول الكبرى إهئ إهئ إهئ.... أعااااااااااااااااااااااااا
خلى بالكم بقى من الحقيقة دى اللى هى أساس الخطاب نفسه واللى مفروض إن الخطاب بيثبتها ماشى خلاويص
((وهى بداية مبنية على أساس حقيقة أن أمريكا والإسلام لايعارضان بعضهما البعض ولا داعى أبدا للتنافس فيما بينهما ، بل ولهما قواسم ومبادىء مشتركة يلتقيان عبرها ، ألا وهى مبادىء العدالة والتقدم والتسامح وكرامة كل إنسان)) يعنى أمريكا والإسلام أخوات.
((كما لايمكننى فى الوقت المحدد لى فى عصر هذا اليوم أن أقدم الإجابة على كافة المسائل المعقدة التى أدت بنا إلى هذه النقطة)) يعنى مفيش حد ابن ظريفة زى شريف منير كده يهز طوله ويسأله أى سؤال إنتوا هنا يا بقر جايين تسمعوا وبس فاهمين ولا ناسيين إنى أنا أصلاً راعى بقر وبالكرباج والله
((أن نعبر لبعضنا البعض بصراحة عما هو فى قلوبنا وعما هو فى كثير الأحيان لايقال إلا وراء الأبواب المغلقة)) يعنى هو هايفتح قلبه آهوه ويتكلم بصراحة يعنى يا بأف إنت وهو اللى كنتم عمالين تسقفوا كل الكلام اللى جاى بعد الكلمتين دول دستور هو ماشى بيه القرآن بتاعه يعنى من الآخر مافيهوش نقاش.
((وينص القرآن الكريم على مايلى : (اتقوا الله وقولوا قولا سديدا). )) يعنى اللى كان بيفترى قبل كده على الغرب وعلى إسرائيل حرام عليه لإن الكداب بيروح النار وإنت بتكدب ليل ونهار ياعربى يا جزمة ياللى مالكش لازمة
كل الكلام اللى جاى ده تثبيت بيمرهم فينا يعنى علشان مانتعورش من اللى بعده
(("الولايات المتحدة لاتكن أى نوع من العداوة تجاه قوانين أو ديانة المسلمين أو حتى راحتهم".)) الكلام ده سنة كام يا ولاد سنة 1796 بتقولوا سنة كام؟؟؟ يعنى ولامؤاخذة أمريكا حاطة الاسلام فى نافوخها من ساعة ما تولى تانى رئيس أمريكى الحكم وإلا كان إيه اللى خلاه يقول كده إلا إذا كان فيه اضطهاد للمسلمين ساعتها..
ياخراب بيتك يا باتعة
((وخدموا فى المناصب الحكومية )) ههههههه ومعانا السميط الهوت (سخن يعنى) ههههههههه حاجة ساقعة يا مستر معانا الغيارات الداخلية حريمى ورجالى وقطن صافى نيهاااااااااااااااااااا

كل الكلام اللى جاى ده بيقول إن الراجل ده مغرور قوى وواخد فى نفسه قطر
((وأعتقد أن أمريكا تمثل التطلعات المشتركة بيننا جميعا بغض النظر عن العرق أو الديانة أو المكانة الإجتماعية : ألا وهى تطلعات العيش فى ظل السلام والأمن والحصول على التعليم والعمل بكرامة والتعبير عن المحبة التى نكنها لعائلاتنا ومجتمعاتنا وكذلك لربنا .
هذه هى قواسمنا المشتركة وهى تمثل أيضا آمال البشرية جمعاء ))
يعنى من الآخر كده أمريكا هى حلم أى حد فى العالم البلاد المثالية بلاد العم سام ..العم جاية من العمى وسام جاية من سام الله عليها... نيهاااااااااااااااا
((فأى نظام عالمى يعلى شعبا أو مجموعة من البشر فوق غيرهم سوف يبوء بالفشل لا محالة إنما يجب معالجة مشاكلنا بواسطة الشراكة ، كما يجب أن نحقق التقدم بصفة مشتركة)) يعنى من الآخر هو شريك أى حد ييجى على مزاجه وتكون بلده كويسة كده ويوميتها حلوة الله يرحمك يا أباظة
((وفى الحقيقة فإن العكس هو الأرجح )) دى بقى ترجمتها بالعكس أبسوليوتلى
يالا بقى بعد فترة الدهان والتثبيت اللى فاتت دى كل واحد يطلع ورقة وقلم ويكتب هو عاوز إيه بالظبط يالا علشان فيه سؤال فى آخر الحلقة؟؟؟
1- المسألة الأولى التى يجب أن نجابهها هى التطرف العنيف بكافة أشكاله
((أمريكا ليست ولن تكون أبدا فى حالة حرب مع الإسلام )) آدى أول حاجة آهيه بعد التطرف العنيف بكل أشكاله اختصر كل الأشكال الوسخة دى فى كلمة واحد ((الإسلااااااااااااااااام)) نو كومنت
((لم نذهب إلى هناك باختيارنا وإنما بسبب الضرورة )) الضرورة دى يعنى دفاع عن النفس
((وأكدت إلى الآن عزمها على إرتكاب القتل مجددا وبأعداد ضخمة)) يعنى احنا قاعدين هناك لحد دلوقتى علشان هما لسه عازمين يعملوا حاجات زى سبتمبر 2001 تانى وتالت ورابع بتحب ولا تنسانيش وأنا فى بعدك باتابع إزاى هاتقدر تعيش
((إن هناك للقاعدة من ينتسبون لها فى عدة بلدان وممن يسعون إلى توسعة نطاق إنشطتهم . وما أقوله ليس بآراء قابلة للنقاش وإنما هى حقائق يجب معالجتها)) يعنى الدولة اللى هاتنكر هاطلع الريليجون أوف هير ماذر
((والآن فى باكستان والذين يحرصون على قتل أكبر عدد من الأمريكيين )) نيهااااااااااا طب إيه اللى موديهم هناك يا ناصح ماهو لو كان فيه هناك إنجليز كانوا سوف يحرصون على قتل أكبر عدد من الإنجليزيين وأى حد ماشى من الشمال لليمين نيهاااااااااااااااا ....... قال على رأى ستى شيل ده من ده يرتاح ده عن ده
((ولكن معظم ضحاياهم من المسلمين)) نيهاااااااااااااااااااااااا بس والله مش قادر وده بقى على أساس إن الأمريكان اللى فى باكستان مسلمين هاهاهاهاهاهاهااااااااااااااااااااااااااااا
((على أن من قتل نفسا بغير نفس (أو فساد فى الارض) فكأنما قتل الناس جميعا، )) ده على أساس إن الأمريكيين اللى فى باكستان كانوا رايحين يتفسحوا بس فيه طيارة هليكوبتر نزلتهم على الشط وقالولهم يسلموا نفسهم للباكستانيين هاهاهاهاهاهاااااااااااااااااااااا الطريق إلى الويلات نيهااااااااااااااااااا
خطة الاستثمار دى أقروها عند نوارة نجم فى كتاب اعترافات سفاح اقتصادى (قريب على المدونة إن شاء الله)
((وقع القرار بحرب العراق بصفة إختيارية )) طب مطلبش ليه مساعدة الجمهور هاهاهاهاهاااااااا
((الشعب العراقى فى نهاية المطاف هو الطرف الكاسب فى معادلة التخلص من الطاغية صدام حسين)) اما حتة دين طاغية شوف يا أخى موت كام واحد بتاع 8 ولا 9 مليون على الأقل، طاغية طاغية يعنى....
((أننا لا نسعى لإقامة آية قواعد فى العراق أو لمطالبة العراق بآي من أراضيه أو موارده . يتمتع العراق بسيادته الخاصة به بمفرده . لذا أصدرت الأوامر بسحب الوحدات القتالية)) بيفكرنى السحب لما الباشتومرجى كده يسحب منى بتاع سطلين دم علشان يشوف سبب الدوخة إيه وبعد ماوقعت من طولى قالى مش عارف أنا بشك إنك بتدلع نيهاهااااااااااااا
((سوف نساعد العراق على تدريب قواته الأمنية وتنمية اقتصاده . ولكننا سنقدم الدعم للعراق الآمن والموحد بصفتنا شريكا له وليس بصفة الراعى)) شريك بنسبة 99.9% ههههههههههههههههههه
((كما أصدرت الأوامر بإغلاق السجن فى خليج جوانتانامو )) هههههههههه نسى يقول إنه أمر بنقله لموقع آخر....
هوففففففففففففف تعبت والله
معلهش استحملونى هانخش على المسألة التانية
2- الوضع ما بين الإسرائيليين والفلسطينيين والعالم العربى :
((إن متانة الأواصر بين أمريكا وإسرائيل معروفة على نطاق واسع . ولا يمكن قطع هذه الأواصر أبدا)) أول القصيدة كفر آهوه وخلى بالكم من الكلام ((متانة الأواصر )) يا سلام عليك جاب من الآخر
((الإعتراف بأن رغبة اليهود فى وجود وطن خاص لهم هى رغبة متأصلة فى تاريخ مأساوى لا يمكن لأحد نفيه )) إهئ إهئ إهئ ....... يالا ياض إنت وهو وهو وهى كل واحد يحط إيده فى جيب اللى جنبه ويتبرع ولو بجنيه لصالح المسكينة إسرائيل
((وتفاقمت أحوال معاداة السامية فى وقوع المحرقة التى لم يسبق لها عبر التاريخ أى مثيل إن نفى هذه الحقيقة هو أمر لا أساس له وينم عن الجهل وبالغ الكراهية )) لاحول ولا قوة إلا بالله
((كما أن تهديد إسرائيل بتدميرها أو تكرار الصور النمطية الحقيرة عن اليهود ، هما أمران ظالمان للغاية ولا يخدمان إلا غرض استحضار تلك الأحداث الأكثر إيذاء إلى أذهان الإسرائيليين )) الصور النمطية الحقيرة دى يعنى شتومة لينا احنا العرب والمسلين يا حقيرين لإن مفيش حد غيرنا بيرسم الإسرائيلين (إنما الدانمارك والرسول لأ عادى يعنى) حسبنا الله وهو نعم الوكيل والصور دى بقى بتجرح الإسرائيلين اصمله عليهم يحفظهم من كل خير إن شاء الله...
((الشعب الفلسطينى ، مسلمين ومسيحيين ، قد عانوا أيضا فى سعيهم إلى إقامة وطن خاص لهم)) يا حرام على المعاناة وحلوة قوى إقامة وطن ليهم دى يعنى من الآخر كده هما اللى جم على اليهود هما اللى حشريين يعنى لما نديهم وطن يبوسوا إيديهم شعر ودقن
((يتحمل الفلسطينيون الإهانات اليومية ، صغيرة كانت أم كبيرة ، والتى هى ناتجة عن الإحتلال)) إهانات هاه إهاناااااااااااااااااااااااااااات وبس
((إذ يشير الفلسطينيون إلى تأسيس دولة إسرائيل وما أدت إليه من تشريد للفلسطينيين ، ويشير الإسرائيليون إلى العداء المستمر والإعتداءات التى يتعرضون لها داخل حدود إسرائيل وخارج هذه الحدود على مدى التاريخ )) الفلسطينيين تشريد والإسرائيليين إعتداءات يا حلاوة شمسنا وخفة ضلنا آآآآآآآآآآآآآآآآآآآآآه يا بلد...
((إذا نظرنا إلى هذا الصراع من هذا الجانب أو من الجانب الآخر ، فإننا لن نتمكن من رؤية الحقيقة)) إن شاء الله تندب رصاصة فى عينك يا بعيد
((يجب على الفلسطينيين أن يتخلوا عن العنف )) إيه سفن إيه
((وأن إطلاق الصواريخ على الأطفال الإسرائيليين فى مضاجعهم أو تفجير حافلة على متنها سيدات مسنات لا يعبر عن الشجاعة أو عن القوة )) وعندك كمان إيه سفن إيه وصلحه
((ويتعين على تنظيم حماس أن يعترف بحق إسرائيل فى البقاء)) دول الفلسطينيين قربوا يخلصوا
يخرب بيتك يا بعيد
((يجب على الدول العربية أن تعترف بأن مبادرة السلام العربية كانت بداية هامة ، وأن مسؤولياتها لا تنتهى بهذه المبادرة ، كما ينبغى عليها أن لا تستخدم الصراع بين العرب وإسرائيل لإلهاء الشعوب العربية عن مشاكلها الأخرى )) يعنى بيسخن الشعوب العربية على حكامها
((بل يجب أن تكون هذه المبادرة سببا لحثهم على العمل لمساعدة الشعب الفلسطينى على تطوير المؤسسات التى سوف تعمل على مساندة دولتهم )) يعنى الدول العربية هى اللى بتشعللها اشرب يا مبارك أقطع دراعى إن ما كان عنده نسخة من الخطاب وعلشان كده ماراحش قال يعنى بيحس نيهااااااااااااااااا
((ومساعدة الشعب الفلسطينى على الاعتراف بشرعية إسرائيل واختيار سبيل التقدم بدلا من السبيل الانهزامى الذى يركز الاهتمام على الماضى )) كل الكلام اللى فوق ده شتيمة فى العرب
تسقيفة أومال تشجيعة أومال ... تعالالى اللالى لالى يا حبيبى تعالالى
هاه
((سوف تنسق أمريكا سياساتها مع سياسات أولئك الذين يسعون من أجل السلم)) الإسرائيليين يعنى يا بهايم
((إننا لا نستطيع أن نفرض السلام)) دى الخلاصة
((الذى تستطيع فيه أمهات الإسرائيليين والفلسطينيين مشاهدة أبنائهم يتقدمون فى حياتهم دون خوف )) الإسرائيليين الأول ماشى؟؟؟؟
يالهوى أنا تعبت خالص أريح شوية وهارجع أكمل أوك
3- حقوق الدول ومسئولياتها بشأن الأسلحة النووية
((إلا أن الأمر الواضح لجميع المعنيين بموضوع الأسلحة النووية هو أننا قد وصلنا الى نقطة تتطلب الحسم وهى ببساطة لا ترتبط بمصالح أمريكا ، ولكنها ترتبط بمنع سباق للتسلح النووى قد يدفع بالمنطقة الى طريق محفوف بالمخاطر )) تتطلب الحسم دى يعنى من الآخر يا إيران انا مش بهزر لتلتزمى يإما ....... إنتى عارفة بقى
((ولا ينبغى على أية دولة أن تختار الدول التى تملك أسلحة نووية ، وهذا هو سبب قيامى بالتأكيد مجددا وبشدة على إلتزام أمريكا بالسعى من أجل عدم إمتلاك أى من الدول للأسلحة النووية)) ههههههههههه عبيط ده ولا إيه الجملة ونفيها فى نفس واحد أكيد الهبل بتوعنا سقفوا فى الحتة دى....
4- الديمقراطية
((لا يمكن لأية دولة ولا ينبغى على أية دولة أن تفرض نظاما للحكم على أية دولة أخرى )) على أساس إن أمريكا بتشارك الدول بنسبة 99,9% مش بتحكمهم يعنى
((ويتطلعون كذلك لشفافية الحكومة وإمتناعها عن نهب أموال الشعب ويتطلعون لحرية إختيار طريقهم فى الحياة )) اشرب يا حسنى وأفرحوا يا بهائية وخبرينى على قتل ياسيييييييين
((إن أمريكا تحترم حق جميع من يرفعون أصواتهم حول العالم للتعبير عن آرائهم بأسلوب سلمى يراعى القانون ، حتى لو كانت آراؤهم مخالفة لآرائنا وسوف نرحب بجميع الحكومات السلمية المنتخبة ، شرط أن تحترم جميع أفراد الشعب فى ممارستها للحكم )) المدونين يعنى واليسار والعلمانيين وأيمن نور وكفاية بقى
((هذا النقطة الأخيرة لها أهميتها لأن البعض لا ينادون بالديمقراطية إلا عندما يكونون خارج مراكز السلطة ، ولا يرحمون الغير فى ممارساتهم القمعية لحقوق الآخرين عند وصولهم الى السلطة )) دى أصح كلمة قالها المحروس بسلامته
((ويجب على الحكام أن يحترموا حقوق الأقليات وأن يشاركوا بروح من التسامح والتراضى ويجب عليهم أن يعطوا مصالح الشعب والأشغال المشروعة للعملية السياسية الأولوية على مصالح الحزب الذى ينتمون اليه )) هههههههههههههه يا نهار أسود يا حسنى إنت وجمال أخدتوا الصابونة ههههههههههههه أحسن تستاهلوا
5- الحرية الدينية
التسامح عندما كنت طفلا فى أندونيسيا هو ليه مش قادر ينسى طفولته فى أندونيسيا دى وكل شوية أندونيسيا أندونيسيا والله شكلهم كسروا عينه هناك أرحمنا بقى
((ثمة توجه مزعج فى أوساط بعض المسلمين ينزع إلى تحديد قوة عقيدة الشخص وفقا لموقفه الرافض لعقيدة الآخر )) الراجل ده حد مالى دماغه بس ملاها صح قوى
6- حقوق المرأة
((وجمهور الحاضرين يوضح لى ذلك - أعلم أن الجدل حول هذا الموضوع يدور بنشاط وأرفض الرأى الذى يعبر عنه البعض فى الغرب ويعتبر المرأة التى تختار غطاء لشعرها أقل شأنا من غيرها ، ولكننى أعتقد أن المرأة التى تحرم من التعليم تحرم كذلك من المساواة)) يعنى كان فيه نسبة محجبات كبيرة وبيشجع تولى المرأة للمناصب وده طبعاً يفسرلنا القرار الجمهوى الأخير بتاع مجلس الشعب وتخصيص 52 مقعد للمرأة على سببيل يعنى التمسح فى أمريكا بس ده أكيد كان قبل الخطاب ما يوصل هههههههههههه
7- التنمية الإقتصادية وتنمية الفرص
((رجال الأعمال المتطوعين لتكوين شراكة مع نظرائهم فى البلدان التى يشكل فيها المسلمون أغلبية السكان )) هانرجع تانى لاعترافات سفاح اقتصادى


((باستطاعة شعوب العالم أن تعيش معا فى سلام . إننا نعلم أن هذه رؤية الرب ، وعلينا الآن أن نعمل على الأرض لتحقيق هذه الرؤية )) يعنى من الاخر ربنا فى السما وأنا وأمريكا فى الأرض.

.

Really We Love You OBAMA

Dear Mr. OBAMA Big Toz To You

تحديث:

اللى لسه عنده امل فى أوباما يخش يقرا خطاب نابليون للشعب المصرى الموجود فى إحدى التعليقات فى مدونة مهندس مصرى .

.

يا فضيحتى يا مصر يا مصر..... يا فضيحتى ياااااا مصر

أنا مش عارف ليه الناس الحقودين والوحشين دول مش بيحبوا أوباما ومش بيحبوا مصر

مش هما دول اللى كانوا بيقولوا إن مصر دى أم الدنيا (انظر الصورة) خلاص آهوه جالها أبو الدنيا كلها ومن حقه يا جدعان يلاقى أم العيال لابسة ومتجهزة وراشة البرفان ومتكلينة وحاطة أفتر شيف كمان من حقه يا جدعان يشوفها لابساله الحتة الزفرة ورزعاله كام تاتوه هنا وواحد كمان هنا (إحممممم لا مؤاخذة) ومنضفة البيت على الآخر وصارفه المصروف كله ومسربة العيال فى الشارع يلعبوا فى الطينة ولا يعملوا بيبى حتى مش مهم ...

المهم إنه الليلادى يا عمدة ..... الليلادى كوم وطلاقى منك كوم تانى ....

وكما قال الشاعر المهيس الكبير

ياواخد أوباما على كلامه يروح بوش ويقعد أوباما على أفعاله (حصرى هاه)

نيهاااااااااااااااااااااااااااااااااااااااااااا

.

.

نعيماً ياعرب

نعيماً مقدماً يا أخ

إللى عليه الدور يا أخوانا

شعر ولا دقن يا أستاذ

وله يا نتن غير الموس يا منيل عاوزين نحلق للزبون متوقفش سوق المحل يا ابن المفرطحة ده المحل زباينه كتير وحلوين وعساسيل خالص.....

يالا يا جزم اللى بعده....

هاسيب بقى كل واحد يتخيل الموقف ده على القفا اللى يريحه
نيهااااااااااااااااااااااااااااااا
.
.

المهرى المنتظر

فرافيروووووووووووووووووو

أنا جاى ى ى ى ى ى ى ى ى ى

والعتبة جزاز والقبة نايلو فى نايلو
ول
والعتبة جزاز والقبة نايلو فى نايلو
ول ول


هو بسلامته أوباما (شيل وحط عليه يا رب) أبويا وتاج راسى اللى كاسينى عمى وعم عيالى من بعدى لما يشرف كده إن شاء الله هايجبلنا معاه إيه وهو جاى من الخليج..


عجلة جديدة من بتوع السلام مش السلام 95 ولا 98 لا سمح الله ولا حاجة لأ الموضوع غير كده خالص ده سلام من نوع تانى كده سلام خواجاتى كده من بتاع بره سلام أمريكانى شحط محط سلام 2009 مش عارف هو ليه رقم تسعة معلق مع كل حاجة فيها سلام ولاأكمنه يعنى شبه المتعلق فى المشنقة كده المهم ما علينا هو بقى بسلامته جاى يملى علينا شروط الفترة اللى جاية كده واللى مش هاينفذ اللى أقول عليه يبقى ذنبه على اللى جنبه وطاخ على قفا اللى جنبه وما العراق منكم ببعيد.


زى ما عمل فى إيران كده قالهم احنا عاوزين نعمل معاكم سلام وكده يبقى قدام إيران حل من اتنين ياإما يوافقوا وتبقى رجليهم جت فى الخية ويقرفوهم بقى تفتيش وتمحيص وتفحيص لحد ما يخلعوهم هدومهم زى العراق كده


ياإما يرفضوا السلام وبكده يبقى سى السيد أوباما الحاكم بأمره عمل اللى عليه وزيادة وإيران لا تلومن إلا نفسها المأسوف عليها لاحقاً زى ما أنا حاسس كده.


بيتهيألى كده السيد الحاكم بأمره أوباما بيه أبو المعاطى هاييجى يقول للعرب قررب قرررررب قرب قرب قرب معانا خطط السلام معانا النفط والبترول قرررب قرررررب قرب قرب قرب معانا اللى مالا عين رأت ولا أذن سمعت معانا السلاح ومعانا جميع المقاسات من كل القوانين قررررب يا أستاذ قربى يا أبلة معانا التهم الجاهزة معانا التهم المتنقية يالا يالا وقلب من تحت يا أستاذ هاتلاقى بلاوى....





وبلاش كلام فى السياسة بقى كفاية لحد كده


مش أول ما نشطح ننطح

وعلى رأى المثل

قال يا مصريين يكفيكوا شر الأوباميين
.
.
.

صباحية مباركة يا عريس

لولولولولولولولووووووووووووووووووووووى

صباحية مباركة يا عريس لولولولولووووووى

صباحية مباركة يا عروسة لولولولولووووووى


والنبى ياختى فرحتلك قوى ..... وبعد كل المقدمات تخش فى حتة علشان تستفرد بيها وتعرف إيه الأخبار وهنا بقى تبقى العروسة نوعين نوع يشد العريس من أول نظرة ويكونوا مع بعض زى السمنة على العسل وكل الناس تبقى عاوزة تشوفهم وتعرف أخبارهم وتفرحلهم وتباركلهم...

أما بقى النوع التانى بعيد عن الآريين تبقى العروسة برضه بتشد العريس بس لتحت لأسفل سافلين ويكونوا مع بعض زى النار والبنزين عمرهم ما يتفقوا أبداً ومحدش يحب يشوفهم ولا يفرحلهم خالص...





أنا ومدونتى



واخدين بعض على حب متجوزين من أسبوعين بس والموضوع ده البكرى بتاعنا وعقبال ما نخاويه كده إن شاء الله ادعولى.........