الأربعاء، 23 سبتمبر 2009

لقاء القطرين



تم بحمد الله اللقاء المرتقب بين مدونين السعودية اللى أنا كنت فاكره هايبقى قاصر على المدونين المصريين لكنى لقيته لقاء بين المدونين المصريين والسعوديين اللى أنا الصراحة استمعت بصحبتهم جداً جداً جداً وأكتشفت إن أحلى حاجة عملتها من ساعة ما عرفت النت هى إنى دخلت عالم التدوين



إيه الناس الحلوة دى



إيه اللى بيحصل ده



يا سلام يا سلام يا سلام





طبعاً رحت متأخر وما لحقتش اللقاء من أوله وكان هناك من اليمين:



1- عبد الله الفهيد كاتب الأنثى



2- محمد السعيد صديق كاتب الأنثى



3- عصام علام أحوال الهوى





5- محمد القويرى قويريات



6- محمد مختار رحيق الحياة



7- ماجد صديق كاتب الأنثى



8- ..... ...... المهندس





واللقاء كان فى ستاربكس الرياض أسفل برج الفيصلية واللى طبعاً كان بيدير اللقاء الدكتور عصام علام وكان بيديره بكل ود وديمقراطية وبنظام إنت معانا ولا لاسمح الله هههههههههههههه..



لا والله يا جماعة اللقاء كان تحفة بجد والدكتور عصام ده من اجمل الشخصيات اللى الواحد عرفها ويتمنى يشوف الناس كلها بنفس الاحترام ده ... راجل مرهف المشاعر رقيق الاحساس بيفهمها وهى طايرة وهو فعلاً طبيب لأحوال الهوى وكمان كان فيه واحد تانى من الناس اللى انا فعلاً أتشرفت بمعرفتها ولقيته المهندس اللى طلب عدم ذكر اسمه وهو شاب مصرى من أسوان وما ادراك ما شعب أسوان يعنى الناس الحلوة ... أوة ... يعنى الناس الطيبة ... إبة ... يعنى الناس الجدعة ... أدعة ... يعنى سمعنى سلام أسمر يا أسمرانى ... رانى ... مين قساك عليا لو ترضى بهوانى ... آنى ... برضه إنت اللى ليا


راجل جدع بكل ما تحمله الكلمة من معانى بس هو مش بيحب الأضواء والشهرة مع إن دماغه عالية جداً وعلى أعلى درجة من الثقافة أنا أول مرة أشوف مهندس كده الصراحة عمال يقرا يقرا يقرا لحد ما خلاااااااص حسسنى إنى بقيت قرطاس لب


نيجى بقى لحبيب هارتى أبو العريف وما ادراك ما أبو العريف ... الراجل ده جالنا من حائل وهى على بعد حوالى 650 كيلو من الرياض بس الصراحة الراجل ده خدعة أنا كنت فاكر بقى إنى هلاقى واحد لمض وبيشاكس لقيته هادى خالص ووديع وحبوب قوى بس إذا ذكرت المجدعة ذكر أبو العريف هو اللى كان السبب فى تجمعنا ده وكان أكتر واحد متحمس للقاء بجد بجد أنا احترمته جداً


والمفاجأة بقى يا جماعة كانت فى المدونين السعوديين شوية شباب يفرحوا ثقافتهم عالية جداً وكان الحوار معاهم ممتع لأقصى درجة
كاتب الأنثى أو عبد الله الفهيد وهو شاب أسمر اللون من نظرة عينيه ترى بئراً لا تستطيع سبر أغواره يذكرنى بقاسم أمين فى دفاعه عن المرأة ويذكرنى بنزار قبانى فى عشقه للمرأة ووصفه لها فهنيأُ لمن هى له
والقويريات وصاحبها محمد القويرى وفى ظنى إنه أحد أفضل مدونى السعودية فهو لم يترك جريدة أو موقع إلا وله فيه كلمة وهو شخص يجذبك من النظرة الأولى وتشعر معه إنه قريب منك أو إنك قد رأيته أو تعاملت معه من قبل
محمد السعيد وماجد لم يسعدنى الحظ بالحديث معهم ولكن من جاور السعيد أكيد هايسعد
وده كان أول لقاء تدوينى ليا
بس كان فيه حاجة غريبة
أنا كنت حاسس بألفة غريبة وأنا قاعد مع الناس دى كنت حاسس إننا عارفين بعض من زمان
أبو العريف بيقولى فيه واحد صاحبه لما لقى أخونا المهندس مهتم قوى بأبو العريف أول ما وصل الرياض واستضافه عنده ... صاحبه مكنش مصدق إن ممكن العلاقة او الصداقة بين المدونين ممكن توصل للدرجة دى من غير حتى ما يشوفوا بعض ... بينى وبينكم أنا كنت بقرا الكلام ده برضه على مدوناتكم بعد كل لقاء تدوينى وكنت باستغرب جداً لحد ما فعلاً وصلى نفس الاحساس
إن شاء الله اللقاء ده يتكرر تانى فى مصر وفى السعودية وعلى الدول المجاورة مراعاة فروق التوقيت